REYKJABORG V

v  V   Adolf Hitler boðaði flotaforingjana Erich Räder og Karl Dönitz, á sinn fund 14 maí 1942 og lýsti áhyggjum sínum vegna flutnings á hergögnum yfir Atlanshafið. Hitler hafði komið það ráð í hug að kafbátsmenn dræpu eftirlifandi sjómenn í björgunarbátum, með því taldi hann að ekki fengjust menn á skipin. Flotaforingjarnir höfnuðu þessari hugmynd Hitlers og svöruðu því til að ef hann útvegaði tundurskeyti sem virkuðu rétt þá þyrði enginn á sjó lengur. Í ársbyrjun 1941 áttu Bretar undir högg að sækja í styrjöldinni, þeir höfðu á tilfinningunni að Íslendingar væru þeim andsnúnir. Forystumenn verkamannafélagsins Dagsbrúnar handtók herinn fyrir að dreifa bréfi þar sem hermenn voru beðnir um að ganga ekki í verkamannastörf ef af boðuðu  verkfalli yrði. Ritstjórar Þjóðviljans og blaðamaður voru handteknir vorið 1941 og settir í Breskt fangelsi þar sem þeir máttu dúsa vikum saman fyrir litlar sakir. Ýmsir hafa haldið því fram að það hafi verið Breskur kafbátur sem réðist á skipin þarna í marsbyrjun 1941.  Tilgangurinn hafi verið að vinna Íslendinga til fylgis við málstað Breta sem á þessum tíma stóðu einir í þessari styrjöld sem þeir voru að tapa og þess vegna vísir til að grípa til örþrifaráða. Við réttarhöld sem haldin voru í Reykjavík vegna þessara skipstapa kom fram að togarinn Geir hafði verið stöðvaður af Breska kafbátnum Torbay N-79 þann 16. mars, 27 mílur út af Barra Head. Yfirmaður á bátnum  skýrði togaramönnum frá því að daginn áður hafi þeir sökkt vopnuðum þýskum togara sem var með Íslenskan fána málaðan á síðuna. TORBAY, hvaða skip var það?

Athugasemdir

[Guðjón Sigþór Jensson, 10.1.2009 kl. 12:11]

Sæll Gestur

Þakka þér fyrir frábæra og fróðlega pistla.

Þegar eg var ungur strákur heyrði eg föður minn sáluga ræða um stríðið og hann sagði mér frá þessu með Reykjaborgina. Hann var fyrstu ár stríðsins að aka vörubíl með rauðamöl úr Rauðhólunum en ók síðar leigubíl.

Nú er skráning atburða mjög mikilvæg með trausta heimildarýni í huga. Fróðlegt væri að vita meira um skráðar heimildir enda verða sögur sem ganga á milli manna vart staðfestar öðruvísi. Á stríðsárunum ríkti mjög ströng ritskoðun m.a. sem beindist að íslensku blöðunum. Flugslys voru t.d. nokkuð algeng og var sjaldan minnst á þau í blöðunum. Þannig rákust tvær herflugvélar saman yfir Reykjafjallinu í Mosfellssveit en það eina sem kom í blöðum var frétt um viðurkenningu sem bóndinn í Helgadal Guðjón Jónsson fékk fyrir að bjarga flugmanninum úr annarri flugvélinni og bera hann til byggða. Þessi frétt birtist löngu eftir atburðinn. Ástæðan fyrir ritskoðuninni var auðvitað að koma í veg fyrir að neikvæðar fréttir kynnu að draga úr baráttuþoli hermannanna sem og að vekja athygli óvinarins á slælegum vörnum.

Með bestu kveðjum.

Mosi

[Gestur Gunnarsson , 10.1.2009 kl. 21:18]

Sæll Guðjón.

Heimildir eru:

Sjóslysasaga 'Islands  , Steinar j Lúðvíksson.

Virkið í norðri, Gunnar M. M.

Vígdrekar og vopnagnýr,  F. Eydal.

Submarine Torbay, Chapman.

Hitlers U boat war,  Blair.

Stutt ýmsum munnlegum heimildum.

Í næsta kafla er sagt frá heimild sem fannst í gær.

Kv.

 Gestur