Grænland 1960 XII

x 

 

 Mér sýndist að orðið "súrra" þýddi það, að festa ætti aftari endann á bobbingalengjunum við afturgálgana, lása trollvírunum í fremri endann, bobbingalengjurnar voru festar með keðjum við lunningarsoðirnar, svo var híft í þetta með spilinu og bremsurnar hertar í botn. Nú verður hamagangur, sagði bóndinn þegar við höfðum gengið frá á dekkinu. Þetta reyndist rétt, því þegar ég var að éta súpuna um kvöldið, fór skipið á hliðina, súpan af mínum diski fór í loftinu yfir Eirík Eyjólfsson sem sat handan borðsins. Eirík sakaði ekki, en ég fékk það litla,sem eftir var á diskinum í fangið þegar skipið rétti sig við. Þegar við höfðum verið u.þ.b. tvo sólarhringa á siglingu, stöðvaðist skipið skyndilega, þetta var rétt eftir kvöldmat. Láta það fara, tvöhundruð og fimmtíu. Hvar erum við núna spurði ég bóndann, við Eldey sýnist mér á fuglunum, svaraði hann. Hvaða fiskur er þar, "þorskur"  sagði bóndinn. Eftir klukkutíma var híft, sjö pokar, tuttugu og eitt tonn, gulur þorskur, feitur og fallegur. Fallegasti afli sem ég hef séð, bingurinn náði frá forgálga aftur að spili. Nú sá ég hvernig Grindvíkingar og Bolvíkingar gera að fiski, engin aðgerðarborð, röðuðu sér á þetta og allt í höndunum. Mennirnir voru eins og stórvirk vinnuvél sem færðist fram eftir þessum bing. Ég var í þvottakarinu og hafði ekki undan, en skyndilega barst mér liðsauki. Það var öflug vatnsbuna, sem kom frá spilinu, þar stóð yfirvélstjórinn skorðaður, með brunaslöngu.

Athugasemdir

[Eyþór Árnason, 3.9.2007 kl. 20:55]

Samasúrrað var notað um eitthvað þrælvafið og bundið ef ég man rétt,en þetta með "bláu hæðina" er auðvitað alveg rétt. Þetta passar allt saman! Kveðja.

[Gestur Gunnarsson , 3.9.2007 kl. 22:16]

Bobbingarnir voru festir með keðjum við lunningarstoðirnar, svo var híft í vírana og spilbremsurnar hertar. Netið var svo bundið upp í lunninguna með netaböndum sem voru með lykkju á öðrum endanum. Hnútarnir voru þannig að það var hægt að leysa allt niður á svona þrem mínútum.   Svo tók aðrar þrjár að koma trollinu út. Í næstu sögu förum við á þorskanet frá Keflavík og þar verður drepinn maður.

Kveðja

Kveðja

Gestur