Reykjavík 1957 XIX

x 

Í seinasta tímanum fyrir lokapróf, las Áki upp nöfn nokkurra stráka  og sagði að þeir þyrftu ekki að koma í prófið nema þeir vildu fá hærra en átta. Ég var einn þessara. Þegar tvær vikur voru liðnar af skólatímanum var auglýst námskeið við skólann í uppsetningu og meðferð olíukynditækja. Ég fór á skrifstofuna og spurði hvort ég mætti vera með. Jú það var allt í lagi og mætti ég svo kl átta  um kvöld nokkrum dögum síðar.

Aðalennari á námskeiðinu var Pétur Pálsson verkfræðingur og kenndi hann það bóklega í tvo tíma og svo var verklegt á eftir sem Kristján Flygenring verkfræðingur sá um ásamt sonum Sigurjóns Einarssonar ketilsmiðs. Þegar skólinn varð 90 ára 1994 var gefið út afmælisrit þar sem stendur að þetta hafi verið fyrsta framhaldsnám fyrir iðnaðarmenn sem haldið var í skólanum.

Við tókum svo próf um vorið í þessum kyndtækjafræðum og fórum í kynnisferð austur á Selfoss þar sem við skoðuðum Mjólkurbú Flóamanna sem þá var nýbyggt. Þar voru heljarmiklar pípulagnir sem Pétur og Kristján höfðu hannað með Jóhannesi Zoëga. Á heimleiðinni áðum við í Eden sem þá var alveg glænýr staður. Svo þegar skólinn var búinn um vorið fór ég aftur í vinnu suður á flugvöll, þar fór ég aftur að vinna við þetta verkstæði og nú kom sér vel að ég hafði verið á námskeiðinu hjá Pétri því vegna sprengihættu var allt hita og rakastýrikerfi loftknúið. Pabbi setti mig nú í að koma þessu kerfi saman ekki fylgdu þessu neinar teikningar svo ég tók bara alla hlutina og leiðbeiningar sem fylgdu hverjum hlut og deildi þessu niður á hitarana. Á hlutunum stóð ýmist M eða B við stútana og sagði pabbi að M þýddi Main og B Branch eða grein. Svo fór þetta allt saman á endanum og virkaði ágætlega. Seinna meir fór ég að spá til hvers þetta verkstæði hafi verið byggt. Á nokkrum áratugum fann ég út að sennilega hafi þetta verið hleðslustöð fyrir kjarnorkusprengjur.

Athugasemdir

[Guðrún Emilía Guðnadóttir, 19.8.2007 kl. 14:39]

Bara að láta vita að ég er að fylgjast með.
           Eigið þið góðan dag.
                      Kveðjur.

[Gestur Gunnarsson , 19.8.2007 kl. 21:50]

Sæl Guðrún.

 Þakka þér fyrir.  Nú fer þessi bútur að verða búinn.  Næsta bút á ég tilbúinn, þá fer ég að veiða fisk við Grænland og svo eitthvað út í heim að afla mér menntunar.

Kv.

Gestur